„სამჯერ გაისროლეს და ფული წაიღეს“ – კლინიკაზე თავდასხმის დეტალები

ამ დროისათვის უცნობია კლინიკიდან წაღებული თანხის ზუსტი რაოდენობა – ქართული ტელეკომპანიების ინფორმაციით, თავდამსხმელებმა კლინიკიდან 5 ათასი ლარი გაიტაცეს.

რეკლამა
eudora.ge

„თბილისის ზღვის ჰოსპიტალზე“ თავდასხმა ორმა შეიარაღებულმა პირმა განახორციელა, განაცხადა სამედიცინო დაწესებულების პრეს-სამსახურის წარმომადგენელმა ჟურნალისტებთან. 

ამ დროისთვის პოლიცია დამნაშავეთა დაკავების მიზნით ოპერატიულ–სამძებრო ღონისძიებებს ახორციელებს. 

„თავდასხმა დაახლოებით დილის ექვსის ნახევარზე მოხდა. ორი შეიარაღებული პირი კარის გაღებას მოითხოვდა. სამჯერ გაისროლეს, საბედნიეროდ, არავინ დაშავებულა, თუმცა დაზიანდა კლინიკის ინვენტარი. მათ ფული წაიღეს“, – განაცხადა პრეს-სამსახურის წარმომადგენელმა ნინო კილაძემ.

მისი თქმით, ამ დროისათვის წაღებული თანხის ოდენობა დგინდება. ქართული ტელეკომპანიების ინფორმაციით, თავდამსხმელებმა კლინიკიდან 5 ათასი ლარი გაიტაცეს.

„მედიაში გავრცელებული რიცხვი სინამდვილეს არ შეესაბამება“, – აღნიშნა კილაძემ.

მომხდარზე გამოძიება სისხლის სამართლის კოდექსის 179-ე მუხლის მეორე ნაწილის „ბ“ ქვეპუნქტით დაიწყო, რაც ჯგუფურად ჩადენილ ყაჩაღობას გულისხმობს. დანაშაული ექვსიდან ცხრა წლამდე ვადით პატიმრობას ითვალისწინებს.

სხვა სიახლეები

სხვა სიახლეები